ஜீ வி பிரகாஷ், கௌதம் வாசுதேவ் மேனன் நடிக்க, கே.விவேக் இயக்கியுள்ள திரைப்படம் ’13.’ கதாநாயகிகளாக ஆத்யா பிரசாத், ‘கதிர்’ படப்புகழ் பவ்யா த்ரிக்கா, தொகுப்பாளினி ஐஸ்வர்யா ஆகியோர் நடித்துள்ளனர்.

மெட்ராஸ் ஸ்டுடியோஸ் அன்சு பிரபாகர் தயாரிப்பில், படப்பிடிப்பு 80 நாட்கள் சென்னை மற்றும் வனப்பகுதிகளில் நடந்து முடிந்தது. அதையடுத்து படத்தின் டப்பிங் பணிகளை ஜீ.வி.பிரகாஷ் மே 4; 2024 அன்று 13:13 மணியளவில் டப்பிங் பேசி தொடங்கிவைத்தார்.

ஜீ வி பிரகாஷ்குமார் பேசியபோது, “’13’ படம் நிச்சயம் வெற்றி பெறும். அதன் கதைக்களம் புதிதாக இருக்கிறது. ‘டார்லிங்’ படத்திற்குப் பிறகு நான் நடிக்கும் ஹாரர் படம் இது. நிச்சயம் பார்வையாளர்களுக்கு புது அனுபவமாக இருக்கும்” என்றார்.

படம் குறித்து இயக்குநர் விவேக் பேசியபோது, “‘ராட்சசன்’, ‘போர் தொழில்’ படங்கள் போல இந்தப் படம் இன்வெஸ்டிகேஷன் த்ரில்லர் ஜானரில் உருவாக்கப்பட்டுள்ளது. நிறைய இன்வெஸ்டிகேஷன் த்ரில்லர் ஜானர் படங்கள் வந்திருந்தாலும் இந்தப் படம் சீட்டின் நுனியில் பார்வையாளர்களை அமர வைக்கும் வகையில் நேர்த்தியாக எடுக்கப்பட்டுள்ளது. பொதுவாக, 13 அன்லக்கி எண் என்று சொல்வார்கள். அந்த நம்பிக்கையை படம் உடைத்துக் காட்டும். நண்பர்கள் ட்ரிப் செல்லும்போது, ஜாலியாக செய்யும் சில விஷயங்கள் அவர்களுக்கு எதிராக எப்படி மாறுகிறது என்பதுதான் கதை. ஜிவி பிரகாஷூடன் வேலை பார்த்திருப்பது என் கனவு நினைவான தருணம். கெளதம் சார் நடிப்பு படத்தை அடுத்த நிலைக்கு எடுத்து சென்றுள்ளது. மற்ற நடிகர்கள் மற்றும் தொழில்நுட்ப குழுவினர் அனைவரும் சிறப்பாக பணியாற்றியுள்ளனர்” என்றார்.