‘காதல் மட்டும் வேணா’ திரைப்படத்தை இயக்கி நடித்த சமீர் அலிகான், தற்போது ‘தமிழ் பையன் இந்தி பொண்ணு’ எனும் படத்தை தனது சூப்பர் ஸ்டார் ஃபிலிம்ஸ் பேனரில் தயாரித்து, இயக்கி நாயகனாகவும் நடிக்கிறார்.
மான்சி நாயகியாக நடிக்கும் இந்த படத்தில் ஆடுகளம் நரேன், பிரம்மாஜி, அலி, சோனியா போஸ், மாலா பார்வதி, தீபிகா அமின், உதயதீப், கும்கி அஸ்வின் உள்ளிட்டோர் முக்கிய வேடங்களில் நடிக்கின்றனர்.
கலகலப்பான காதல் கதையாக, அதிக பொருட்செலவில் பாலிவுட் படங்களுக்கு இணையாக, மிகவும் ஸ்டைலான முறையில் இந்த படம் உருவாகியுள்ளது.
படப்பிடிப்பு சென்னை, கோயம்புத்தூர் மற்றும் புதுச்சேரி உள்ளிட்ட இடங்களில் நடந்து நிறைவு பெற்றுள்ளது. படம் வரும் ஆகஸ்ட் மாதம் வெளியாகவிருக்கிறது.
படம் பற்றி இயக்குநரிடம் கேட்டபோது “திருச்சூரில் பிறந்து கோயம்புத்தூரில் வளர்ந்த நான் விஸ்காம் பட்டம் பெற்ற பின்பு ‘காதல் மட்டும் வேணா’ திரைப்படத்தை இயக்கி நடித்தேன். தற்போது ‘தமிழ் பையன் இந்தி பொண்ணு’ படத்தை தயாரித்து இயக்குவதோடு முதன்மை வேடத்திலும் நடிக்கிறேன். இரண்டு வெவ்வேறு பின்னணிகளை கொண்ட நாயகனும் நாயகியும் காதலில் விழுகின்றனர். இவர்கள் காதலுக்கு எத்தகைய இடையூறுகள் எழுகின்றன, அத்தனை தடைகளையும் வெற்றிகரமாக கடந்து எவ்வாறு இணைகின்றனர் என்பதை மிகவும் கலகலப்பான முறையில் சொல்லியிருக்கிறோம்” என்றார்.