’13/13 லக்கி நன்’ படத்தில் கதாநாயகியாக நடித்திருப்பதோடு இயக்கி, இசையமைத்து, தயாரித்திருக்கிறார் மேக்னா.

அவருடைய படத்தின் இசைவெளியீட்டு விழா சென்னையில் நடந்தது. நடிகர் எஸ்வி சேகர், தம்பி ராமையா, நடிகர் நட்டி, தயாரிப்பாளர் தேனப்பன், இயக்குநர் கண்ணன், ஜெய்குமார், கலை இயக்குநர் ராமலிங்கம் உள்ளிட்ட பலர் கலந்துகொண்டனர்.

நிகழ்வில் பேசிய மேக்னா, ”இந்த ஹாரர் திரில்லர் படம் விரைவில் திரைக்கு வருகிறது. மலேசியாவிலும், தமிழ்நாட்டிலும் படப்பிடிப்பு நடைபெற்றது” என்றார்.

விழாவிற்கு வந்திருந்த சிறப்பு விருந்தினர்கள் படத்தை பாராட்டி பேசினார்கள். அந்த வரிசையில் நடிகரும் இயக்குநருமான தம்பி ராமையா பேசியபோது, ”பல வருடங்களுக்குப்பிறகு தமிழ் சினிமாவில் ஒரு கதாநாயகி படத்தின் இயக்குநராக , இசையமைப்பாளராக, தயாரிப்பாளராக வருகிறார். அவரை நாம் வரவேற்கவேண்டும். திரைப்படத்துறையில் யார் வேண்டுமானாலும் உழைப்பும், திறமையும், அர்ப்பணிப்பும் இருந்தால் ஜெயிக்கலாம்” என்றார்.