தமிழ்நாடு போதைப் பொருள் ஒழிப்பு பிரிவு சார்பில் நடந்த விழாவில், லியோ ஜூட் S/O உபகார மேரி இயக்கிய ‘டைமுக்கு சாப்பிடு பை பாத்திமா’ என்ற குறும்படம் வெளியிடப்பட்டது.
குறும்படம் என்றாலே மெசேஜ் சொல்வதை வழக்கமாக வைத்திருப்பதை பார்த்திருக்கிறோம். இந்த படத்தில் உண்மைச் சம்பவத்தின் அடிப்படையில் அழகான திரைக்கதையில் நெஞ்சை நெகிழ வைக்க வைக்கும் காட்சிகளைக் கோர்த்துள்ளனர். கூடவே மெசேஜும் இருக்கிறது.
இந்த படத்தில் நவீன், ஜெயந்தி, சுதா, அனு ஆகியோர் கதையின் பாத்திரங்களாக நடித்திருக்கின்றனர்.
இந்த குறும்படத்தின் வெளியீட்டு விழாவில் ஏடிஜிபி அமல்ராஜ் ஐபிஎஸ் கலந்துகொண்டு படத்தை இயக்கியவருக்கும் படத்தில் பணிபுரிந்த தொழில்நுட்ப கலைஞர்களுக்கும் விருதுகள் மற்றும் சான்றிதழ்கள் வழங்கி கௌரவித்தார்.
அப்போது பேசிய அவர் போதைப்பொருள் ஒழிப்பில் தமிழ்நாடு அரசும் தமிழ்நாடு போலீசாரும் முழு வீச்சில் செயல்பட்டு வருவதாக குறிப்பிட்டார்.
இந்த குறும்படத்தின் இயக்குநர் லியோ ஜூட் 20 ஆண்டுகளுக்கு மேலாக க்ரைம் மற்றும் அரசியல் பத்திரிகையாளராக என்.டி.டி.வி முதல் முன்னணி தொலைக்காட்சி நிறுவனங்களில் தலைமை செய்தியாளராக பணிபுரிந்துள்ளார்.
திரைத்துறை மீதுள்ள ஆசையால் பணியைத் துறந்து ‘ப்ளூ பிக்ஸ் நியூஸ்’ என்ற நிறுவனத்தை துவங்கி நடத்தி வருகிறார். தமிழ்நாடு காவல்துறையில் பெண்கள் நுழைந்து 50 ஆண்டுகள் நிறைவடைந்த மாபெரும் சாதனையை டாக்குமென்ட்ரி படமாக எடுத்தபோது, அதை தமிழ்நாடு முதல்வர் ஸ்டாலின் அவர்கள் வெளியிட்டு பாராட்டு தெரிவித்தார்.
10க்கும் மேற்பட்ட குறும்படங்களை தமிழ்நாடு காவல்துறைக்கு இந்த நிறுவனம் எடுத்துக் கொடுத்துள்ளது என்பது குறிப்பிடத்தக்கது!