சமீபத்தில் வெளியான ‘குடும்பஸ்தன்’ படத்திற்கு கிடைத்த பெரியளவிலான வெற்றியில் கதாநாயகனின் மனைவியாக நடித்த சான்வே மேகன்னாவுக்கும் மிகப்பெரிய பங்குண்டு. வெண்ணிலா என்ற கதாபாத்திரத்திற்கு அவரது இயல்பான மற்றும் ஆழமான நடிப்பு, ரசிகர்களுக்கு அந்தக் கதாபாத்திரத்தை மறக்க முடியாததாக மாற்றியுள்ளது.இந்த வெற்றியைத் தொடர்ந்து, அவருக்கு அடுத்தடுத்து வாய்ப்புகள் குவிந்து வருகிறது.
சினிமாவில் நடிப்பதற்கான வாய்ப்பு அவருக்கு எதிர்பாராத விதமாகதான் வந்தது. ஹைதராபாத்தில் படித்துக் கொண்டிருக்கும்போது அவரிடம் ஏதோ ஒன்று சிறப்பாக இருப்பதை கணித்த நடிகை ஜெயசுதா சான்வேக்கு முதல் பெரிய வாய்ப்பை கொடுத்தார். அந்த தருணம்தான் சான்வேக்கு நடிப்பின் மீது ஆர்வத்தைத் தூண்டியது. கடந்த ஏழு ஆண்டுகளில் ’பிட்ட காதலு’ (நெட்ஃபிலிக்ஸ்), ’புஷ்பக விமானம்’ மற்றும் ’பிரேம விமானம்’ ஆகிய படங்களின் மூலம் அவர் தனது கரியரில் முன்னேறியுள்ளார். ’குடும்பஸ்தன்’ அவரை இன்னும் அடுத்த கட்டத்திற்கு நகர்த்தி சென்று, கதாநாயகியாக அவருக்கு பெரும் வெளிச்சத்தைக் கொடுத்திருக்கிறது. அடுத்தடுத்து ஆக்ஷன் ஸ்பை த்ரில்லர், தீவிரமான ஸ்போர்ட்ஸ் கதை, ரொமாண்டிக் காமெடி போன்ற வித்தியாசமான கதைத்தேர்விலும் கதாபாத்திரங்களிலும் நடிக்க ஆசைப்படுகிறார். இதுபோன்ற கதைகளில் முழுமையான நடிப்புத் திறனை வெளிப்படுத்த முடியும் என்கிறார்.
அவரிடம் பேசியபோது, “’குடும்பஸ்தன்’ படத்திற்கு ரசிகர்கள் கொடுத்து வரும் பாராட்டு மகிழ்ச்சியாக இருக்கிறது. படத்தில் என்னுடைய கதாபாத்திரத்தைப் பலரும் தங்களுடன் பொருத்திக் கொண்டார்கள்.
நடிகை ஸ்ரீதேவிதான் எனக்கு இன்ஸ்பிரேஷன். அவரைப் போலவே இயல்பான நடிப்பை திரையில் கொண்டு வர வேண்டும்” என்றார்.
தனது திறமை மீது நம்பிக்கைக் கொண்டு அர்ப்பணிப்போடு செயல்படும் சான்வே சினிமாவில் தனக்கான தனித்துவமான இடத்தைப் பிடிப்பார் என்று உறுதியாக நம்பலாம்.