திருடனைப் பிடித்து சிறையில் அடைப்பது வழக்கம். இந்த கதையில் ஒரு திருடன் சிறையிலிருந்து ஒன்றரை லட்ச ரூபாயை திருடுகிறான்.

திருடுவதுதான் நோக்கம் என்றால் வேறெங்காவது போய் திருடலாம். பல அடுக்கு பாதுகாப்புள்ள சிறைக்குள் புகுந்து திருட வேண்டிய அவசியம் என்ன? திருடியவன் யார்? பாதுகாப்புகளை மீறி அவன் எப்படி திருடினான்? என்பதையெல்லாம் ஜெயிலரும், சப் ஜெயிலருமாக சேர்ந்து எப்படி கண்டுபிடிக்கிறார்கள் என்பதே காக்கி சர்க்கஸின் ஸ்க்ரீன்பிளே

குற்றவாளி யார் என தெரிந்தும், அவனை சட்டப்படி எதுவும் செய்ய முடியாமல் தவிக்கிற சப் ஜெயிலராக சுபாஷ் செல்வம், லட்சணமாக இருக்கும் அவர் முகத்தில் பரபரப்பையும் டென்சனையும் காட்டியிருக்கும் விதம் இயல்பாக இருக்கிறது. காதல் காட்சிகளிலும் ஸ்கோர் செய்கிறார்.

இப்படியொரு சாதுவான ஜெயிலரை இதுவரை எந்த சிறைச்சாலையும் பார்த்திருக்க முடியாது. அப்படியொரு வித்தியாசமான ஜெயிலராக வருகிற முனீஸ்காந்த், புத்தகங்களை வாசிக்க வைத்து குற்றவாளிகளுக்குள் நல்லெண்ணம் உருவாக வழி வகுப்பது தனித்துவம்.

வித்தியாசமான நோக்கத்துக்காக திருடுவது, திருடிவிட்டு, அமாம் நான்தான் திருடினேன்; உன்னால என்னை என்ன பண்ண முடியும் என ஜெயிலரிடம் கெத்து காட்டுவது என ராஜேஷ் மாதவன் உடல்மொழியால் கவனம் பெறுகிறார்.

வின்ஸு ரேச்சல் ஷாமுக்கு ஹீரோ சுபாஷை காதலிக்கும் வேலை. அதை அழகாக, அளவாக செய்திருக்கிறார். அப்துல் லீ சவப்பெட்டி தயாரித்து விற்பனை செய்வதில் ஒரு விபரீதத்தை சந்தித்து அவதிப்படுபவராக கவனம் பெறுகிறார். மற்ற நடிகர் நடிகைகள் கதைக்கு தேவையானபடி நடித்திருக்க, விபின் பாஸ்கரின் பின்னணி இசை திரைக்கதையின் போக்கிற்கேற்ப பயணித்திருக்கிறது.

சிறைச்சாலை, பேருந்து நிலையம், சம்பவங்கள் நடக்கும் ஊரின் ஒருசில பகுதிகளை கண்கவரும் விதத்தில் பதிவு செய்திருக்கிறது ஒளிப்பதிவாளர் நீரஜ் ரெவியின் கேமரா.

இயக்குநரும் சரி, இசையமைப்பாளர், ஒளிப்பதிவாளர், ஹீரோயின் என பலரும் கேரளாவை ச் சேர்ந்தவர்கள். மலையாள இயக்குநர்கள் சிறிய ஒன்லைனை எடுத்துக்கொண்டு திரைக்கதையை சுவாரஸ்யபடுத்துவதில் கில்லாடிகள். அவர்களில் ஒருவரான அமீன், திருடன் ஒருவனை பிடிக்க களமிறங்கும் போலீஸ் என்ற ஒருவரியை எடுத்துச் கொண்டு, சுவாரஸ்யங்களும் திருப்பங்களும் கலந்துகட்டிய திரைக்கதை அமைத்து, பார்வையாளர்களுக்கு வித்தியாசமான, திருப்தியான அனுபவம் தருகிறார்.

இந்த வெப் சீரிஸ் ஏப்ரல் 10; 2026-லிருந்து ZEE5 ஓடிடி தளத்தில் ஸ்ட்ரீமாகிறது.

Rating 3.5 / 5