பிக் பாஸ் முகேன் ராவ் கதையின் நாயகனாக நடித்திருக்கும் காமெடி ஹாரர் படம் ‘ஜின் – தி பெட்.’ இந்த படம் மே 30-ந்தேதி வெளியாகவுள்ள நிலையில் படத்தின் இசை மற்றும் முன்னோட்ட வெளியீட்டு விழா சென்னையில் நடந்தது.
நீதியரசர் எஸ் கே கிருஷ்ணன், ஓய்வு பெற்ற காவல் துறை உயரதிகாரி பன்னீர் செல்வம் ஐபிஎஸ், ஆன்மீக சொற்பொழிவாளர் மகாவிஷ்ணு, தயாரிப்பாளர் கேயார், ஃபெப்சி தலைவர் ஆர்.கே. செல்வமணி, இயக்குநர் சங்க தலைவர் ஆர். வி. உதயகுமார் , செயலாளர் பேரரசு , துணைத் தலைவர் ஆர்.அரவிந்தராஜ், கில்டு தலைவர் ஜாகுவார் தங்கம் ஆகியோர் சிறப்பு விருந்தினர்களாக கலந்து கொண்டனர். தமிழ்நாடு திரைப்பட கல்லூரியின் முதல்வரும் இயக்குநருமான திருமலை வேந்தன் வரவேற்றார்.
நிகழ்வில் பேசிய நடிகர் முகேன் ராவ், ”இயக்குநர் டி ஆர் பாலாவுடன் ‘ஒற்றைத் தாமரை’ என்ற வீடியோ ஆல்பத்தில் இணைந்து பணியாற்றிருக்கிறேன். என்ன தேவை என்பதில் அவரிடம் ஒரு தெளிவு இருக்கும். இந்த ‘ஜின்’ படத்திலும் அவருக்கு என்ன தேவையோ, அதனை நடிகர்களிடமிருந்து பெற்றார். அவர் இந்தப் படத்தின் மூலம் இயக்குநராகவும், தயாரிப்பாளராகவும் கடுமையாக உழைத்திருக்கிறார். இதற்காகவே அவரை நான் மனதார பாராட்டுகிறேன். இயக்குநரின் பெற்றோர்களான வேந்தன்-ராஜேஸ்வரி தம்பதிகளுக்கும் நன்றியை தெரிவித்துக்கொள்கிறேன்.
தொடக்கத்தில் விவேக் மெர்வின் என்பது ஒருவர் என நினைத்துக் கொண்டிருந்தேன். பிறகுதான் அவர்கள் இருவர் என்று தெரிந்துகொண்டேன். ஏராளமான ஹிட் பாடல்களை வழங்கியுள்ளார்கள். அவர்களுடன் இணைந்து பணியாற்றியது மறக்கமுடியாத அனுபவமாக இருந்தது. இந்தப் படத்தில் நான்கு சண்டைக் காட்சிகள். சண்டைக் காட்சிகளில் நடிக்கவேண்டும் என்று ஆசை இருந்தது. இந்த திரைப்படத்தில் உள்ள நான்கு சண்டையிலும் ‘ஜின்- தி பெட்’டிற்குதான் முக்கியத்துவம் இருக்கும். அது என்ன? என்பதை நீங்கள் திரையில் பார்த்து தெரிந்துகொள்ளுங்கள்.
தொடர்ந்து படங்களில் நடித்து வருகிறேன். சில படங்களின் பணிகள் நிறைவடைந்துள்ளது. அது தொடர்பான விவரங்கள் விரைவில் உங்களுக்கு தெரியவரும்” என்றார்.
இந்த படத்தில் பவ்யா தரிகா, டத்தோ ராதாரவி, பால சரவணன், இமான் அண்ணாச்சி, நந்து ஆனந்த், வடிவுக்கரசி, ’நிழல்கள்‘ ரவி, வினோதினி வைத்தியநாதன், ஜார்ஜ் விஜய் , ரித்விக் உள்ளிட்ட பலர் நடித்திருக்கிறார்கள்.