உயிருக்கு உயிரான காதலியின் உயிர் பிரியும் நாள் எது என்பதை தெரிந்து கொள்ளும் காதலன் அவளைக் காப்பாற்ற போராடுகிற கதை.
வானியல் ஆராய்ச்சியில் ஈடுபடுகிற நாயகன் அஜிதேஜுக்கு சூரிய கிரகண நாளில் ஒருவித விசேச கக்தி கிடைக்கிறது. அதிலிருந்து, அவர் யாருடைய கண்களை பார்க்கிறாரோ அவருடைய மரண நாள் தெரிந்து விடும். அதன்படியே அவர்கள் மரணமடைகிறார்கள். அதேபோல் அவனுக்கு தன் காதலி இன்னும் ஏழு நாட்களில் இறந்து விடுவாள் என்பது தெரிகிறது. மனம் உடைந்துபோகும் காதலன் அவளைக் காப்பாற்ற ‘அந்த 7 நாட்கள்’ படும்பாடுதான் படத்தின் கதை…
காதல் வயப்படும்போது உற்சாகமாக, காதலியின் உயிரைக் காப்பாற்றுவதற்கான செயல்பாடுகளில் பயம் பதற்றம் சூழ்ந்தவராக நடிப்பில் தன் கடமையை பொருத்தமாக செய்திருக்கிறார் நாயகன் அஜிதேஜ்.
நாயகி ஸ்ரீஸ்வேதா காதல் காட்சிகளில் மனதைக் கவரும்படியும் உயிருக்குப் போராடும்போது மனம் கலங்கும் விதத்திலும் நடித்திருக்கிறார்.
இயக்குநர் கே பாக்யராஜுக்கு அவர் இயக்கிய அந்த 7 நாட்கள் படம் கொடுத்த அங்கீகாரம் மிகப் பெரியது. அவரது படத்தின் தலைப்பை சுமந்துள்ள இந்த படத்தில் அவர் அமைச்சராக நடித்து தனது கேரக்டரை கவனிக்க வைத்திருக்கிறார்.
கதாநாயகனின் அப்பாவாக நமோ நாராயணன், வழக்கறிஞராக வருகிற சுபாஷினி கண்ணன், கதாநாயகியின் தந்தையாக காவல்துறை உயரதிகாரியாக வருகிறவர் என மற்றவர்கள் கச்சிதமான நடிப்பைத் தந்திருக்கிறார்கள்.
படத்தின் விறுவிறுப்பான காட்சிகளை சுறுசுறுப்பாக்க சச்சின் சுந்தரின் பின்னணி இசையும் கதை நடக்கும் கொடைக்கானலின் அழகை ரசிக்க கோபிநாத் துரையின் ஒளிப்பதிவும் உதவியிருக்கிறது.
வழக்கமான காதலோடு வானியல் ஆராய்ச்சி, சூரிய கிரகணம் என இடைவேளை வரை அறிவியலை பிடித்துக் கொண்டு நகரும் கதை, இடைவேளைக்குப் பிறகு நாய்க்கடியால் பாதிக்கப்பட்டு மரணத்தை நெருங்கிக் கொண்டிருக்கிற ஹீரோயினை சுற்றிச் சுழலும்போது அடுத்து என்ன நடக்கும் ஏது நடக்கும் என்ற எதிர்பார்ப்பை உருவாக்கி வித்தியாச அனுபவம் தருகிறது.
Rating 3.5 / 5
