ஏ.எல்.உதயா நடித்த ‘அக்யூஸ்ட்’ திரைப்படம் வெளியான நாள் முதல் நேர்மறை விமர்சனங்கள், பத்திரிகையாளர்கள் மற்றும் ஊடகவியலாளர்களின் பாராட்டு, மற்றும் ரசிகர்களின் ஆதரவை பெற்று வரும் ‘அக்யூஸ்ட்’, திரையரங்குகளில் வெற்றி நடை போட்டு வருகிறது.
படத்தின் 25வது நாள் வெற்றி விழா சென்னை ஆல்பர்ட் திரையரங்கில் ரசிகர்கள் முன்னிலையில் படக்குழுவினரால் கொண்டாடப்பட்டது. திரைப்படத்தைக் காண வந்த ரசிகர்களின் உற்சாக பாராட்டுகளோடு படக்குழுவினர் கேக் வெட்டி ‘அக்யூஸ்ட்’ வெற்றியை கொண்டாடி மகிழ்ந்தனர். ‘அக்யூஸ்ட்’ திரைப்படத்தின் தொடக்க விழா ஆல்பர்ட் தியேட்டரில் நடைபெற்றிருந்த நிலையில் அதன் வெற்றி கொண்டாட்டமும் அதே திரையரங்கில் நடந்தேறியது!
தவிர இன்று புரட்சி கலைஞர் கேப்டன் விஜயகாந்த் பிறந்த நாளை முன்னிட்டு கோயம்பேட்டில் உள்ள அவரது கேப்டன் ஆலயம் நினைவிடத்திற்கு சென்ற நடிகர் உதயா உள்ளிட்ட ‘அக்யூஸ்ட்’ படக்குழுவினர் அங்கு மலர் அஞ்சலி செலுத்தி மரியாதை செய்தனர்.
இது குறித்து பேசிய உதயா, “கலை உலகத்திற்கும் திரையுலகினருக்கும் எவ்வளவோ நன்மைகளை செய்த கேப்டன் அவர்களின் பிறந்த நாளில் ‘அக்யூஸ்ட்’ திரைப்படத்தின் வெற்றியை கொண்டாடுவதில் மிக்க மகிழ்ச்சி அடைகிறோம். இந்த வெற்றியை ரசிகர்களுக்கு சமர்ப்பிக்கின்றோம். இதற்கு காரணமான படக்குழுவினர், பத்திரிகையாளர்கள், ஊடகவியலாளர்கள், விநியோகஸ்தர்கள், திரையரங்கு உரிமையாளர்கள் உள்ளிட்ட அனைவருக்கும் நெஞ்சார்ந்த நன்றியை காணிக்கை ஆக்குகின்றோம்,” என்றார்.