மிரட்டலான ஹாரர் அனுபவம் தரும் படங்களின் வரிசையில் நிஜமாகவே வித்தியாசமான கதையோடு வந்திருக்கிற படம்.

கல்லூரி நண்பர்கள் சிலர் ஆர்வமாக கார்டு விளையாடுகிறார்கள். தீயில் போட்டால்கூட எரியாத, தீயசக்தியால் ஆக்கிரமிக்கப்பட்ட அந்த கார்டுகளில் இருக்கிற பேயின் உருவம் நிஜத்தில் தோன்றுகிறது. விளையாடுகிற ஒவ்வொருவரையும் கொல்கிறது. பேய்கள் வெவ்வேறு தோற்றங்களில் இருப்பதும் கொலை செய்வதில் இருக்கும் கொடூரமும் மிரட்டலாக இருக்கிறது.

அப்படியான நிகழ்வுகளால் கதையில் விறுவிறுபு உருவாக, பேய்களிடமிருந்து தப்பிக்க அந்த நண்பர்கள் எடுத்துக் கொள்கிற முயற்சியும் அதில் அவர்கள் சந்திக்கும் சவால்களுமே அடுத்தடுத்த காட்சிகள்… யாரெல்லாம் உயிர் பிழைத்தார்கள் என்பது கிளைமாக்ஸ்.

1992-ல் நிக்கோலஸ் ஆடம் எழுதிய ‘ஹாரர்ஸ்கோப்’ எனும் நாவலை அடிப்படையாகக் கொண்டு, திரைக்கதை எழுதி இயக்கியிருக்கிறார் Spenser Cohen and Anna Halberg.

ஜோசப் பிஸ்ராவின் பின்னணி இசை திகில் காட்சிகளுக்கு கூடுதல் சுறுசுறுப்பு சேர்க்க, லி ஸ்மோல்கினின் ஒளிப்பதிவும் Harriet Slater, Adain Bradley, Avantika, Wolfgang Novogratz, Humberly González, Larsen Thompson and Jacob Batalon என நடிகர்கள், நடிகைகளின் தேர்ந்த நடிப்பும் படத்தின் தரத்தை உயர்த்தியிருக்கிறது.

நண்பர்கள் குழுவில் ஒருவராக வருகிற அவந்திகா தமிழ், தெலுங்கு திரைப்படங்களில் நடித்துவருபவர். அவரது இளமை ததும்பும் அழகும் துடிப்பான நடிப்பும் மனதுக்குள் நிறைகிறது.

Tarot – திகில் பட விரும்பிகளை கண்டிப்பாக திருப்திபடுத்தும்.