ஜுராசிக் பார்க் யூனிவர்ஸின் 7-வது பாகமாக உருவாகியிருக்கிறது `ஜுராசிக் வேர்ல்டு ரீபர்த்.’
வழக்கமான மனிதர்களை வளைத்துப் பிடித்துக் கொல்லும் முரட்டு டைனோசர், ஒட்டகச்சிவிங்கி போல் நீளமான கழுத்துடைய சைவ உணவு எடுத்துக் கொள்ளும் டைனோசர் என பார்த்துப் பழகிய டைனோசர்களுடன் இந்த பாகத்தில் கடலுக்குள் வாழ்கிற பிரமாண்டமான டைனோசரை பார்க்க முடிகிறது.
அந்த மூன்று விதமான டைனோசர்களின் டி என் எ’விலிருந்து மனிதர்களை இதய நோயிலிருந்து மீட்பதற்கான மருந்து தயாரிக்க முடியும் என்பதால், அந்த டைனோசர்களிடமிருந்து ரத்த மாதிரிகள் சேகரிப்பதற்காக கடல் வழியாக ஆராய்ச்சியாளர்கள் குழு ஒன்று புறப்படுகிறது.
அதே கடலில் ஒரு குடும்பம் படகில் பயணித்துக் கொண்டிருக்கிறது. அந்த படகை கடலில் வாழும் டைனோசர் தாக்க, படகு கவிழ்கிறது. அதில் பயணித்த குடும்பத்தினரை ஆராய்ச்சியாளர்கள் குழு மீட்டெடுத்து தங்களுடன் சேர்த்துக் கொண்டு பயணத்தை தொடர்கிறார்கள்.
எல்லோருமாக சேர்ந்த பயணத்தில் ஆராய்ச்சியாளர்கள் டைனோசர்களின் ரத்த மாதிரிகளை சேகரிப்பதற்குள் படுகிற பாடும், சந்திக்கும் சவால்களும்தான் கதையோட்டம்…
மருந்து நிறுவன அதிபராக ரூபர்ட் ஃப்ரெண்ட், முன்னாள் ராணுவ அதிகாரியாக ஸ்கார்லட் ஜான்சன், ப்ழங்கால உயிர்கள் ஆராய்ச்சியாளராக ஜானாதன் பெய்லி, கப்பல் கேப்டனாக மஹர்ஷலா அலி என முக்கிய கதாபாத்திரங்களில் நடித்துள்ளவர்கள் கதைக்கேற்ற பதற்றமும் பயமும், எடுத்துக் கொண்ட வேலையில் காட்ட வேண்டிய அர்ப்பணிப்பையும் தங்கள் நடிப்பில் கொண்டு வந்திருக்கிறார்கள். மற்றவர்களும் நேர்த்தியான பங்களிப்பைத் தந்திருக்கிறார்கள்.
ஆபத்தான இடங்கள், டைனோசர்களின் தாக்குதல், அதையெல்லாம் சமாளித்து தங்கள் தேவையை நிறைவேற்றிக்கொள்வதில் போராட்டங்களைச் சந்திக்கும் குழுவினர் என வழக்கமான சாகசப் பயண டெம்ப்ளேட்டில் எடுக்கப்பட்டிருந்தாலும் மிரட்டலான, பிரமாண்டமான மேக்கிங் படத்தை ஆர்வமாக பார்க்க உதவுகிறது.
படம் உங்களுக்கு கொஞ்சம் சலிப்பு தட்டினாலும் உங்களின் குட்டிச் சுட்டீஸுக்கு டைனோசர்களை பார்ப்பது சலிப்பு தட்டாது. அதுவும் இந்த முறை கடல் பயணம், கடலுக்குள் டைனோசர் என கூடுதல் சுவாரஸ்யங்கள் அணிவகுக்கின்றன.