சாவு வீட்டில் சுவாரஸ்யமான, மர்மமான, அமானுஷ்யமான, கலகலப்பான சம்பவங்கள் நடப்பது போன்ற திரைப்படங்கள் அவ்வப்போது வருவதுண்டு. தண்டட்டி, எமகாதகி, பெருசு என பல படங்களை உதாரணமாகச் சொல்லலாம். அந்த வரிசையில் எளிமையான கதையில், எளிய பட்ஜெட்டில் உருவாகியுள்ள ‘சாவீ.’
அந்த இளைஞன், தன் தந்தையைக் கொன்றதாக நம்பும் நபரின் மகளைக் காதலிக்கிறான். அந்த தந்தை ஒரு நாள் விபத்தில் இறந்துபோக, அவரது உடலை இரவு முழுக்க பத்திரமாக பாதுகாக்கும் பொறுப்பை அந்த இளைஞனிடம் ஒப்படைத்து விட்டு சம்பந்தப்பட்ட குடும்பத்தினர் ஒட்டுமொத்தமாக தூங்கி விடுகிறார்கள். தூங்கி எழுந்து பார்த்தால் உடலைக் காணவில்லை.
உடலை யாரிடம் ஒப்படைத்தார்களோ அந்த இளைஞன் உட்பட பலர் மீது சந்தேகம் உருவாகிறது. உடல் எப்படி காணாமல் போனது? என்பதை கண்டறிய போலீஸ் வருகிறது. விசாரிக்க வந்த போலீஸ் மீதே சந்தேகப்படுகிறது சம்பந்தப்பட்ட குடும்பம்.
நடந்தது என்ன என்பதை அடுத்தடுத்த காட்சிகளில் பார்க்க முடிகிறது. அவற்றில் கலகலப்பும் திருப்பங்களும் நிரம்பியிருக்கிறது…
துறுதுறுவென்றிருக்கிறார் கதைநாயகன் உதயா தீப். காமெடி கலாட்டாக்களுக்கு உடல்மொழி ஒத்துழைக்கிறது. காதல் சார்ந்த நடிப்புக்கு பாஸ்மார்க் கொடுக்கலாம்.
அவருக்கு ஜோடியாக வருகிற கவிதா சுரேஷ் இளமையாலும் இதமான பேச்சுக்களாலும் கேரக்டருக்கு பொருத்தமான பக்குவமான நடிப்பாலும் கவர்கிறார்.
காவல்துறை உயரதிகாரியாக வருகிற ஆதேஷ்பாலா, சந்தேகப்படுபவர்களை விசாரிக்கும்போது அதற்கேற்ற வீரியத்தைக் காட்டுகிறார்.
மற்றவர்கள் கதையோட்டத்தின் தேவையறிந்து அளவாக நடித்திருக்க, பின்னணி இசையும் ஒளிப்பதிவும் படத்தின் பலமாகியிருக்கின்றன.
கதாநாயகனின் கனவில் வருபவர்கள் அசம்பாவிதத்தை சந்திப்பது, நிஜத்திலும் அப்படியே நடப்பது என ஆரம்பக் காட்சியை அமைத்து அடுத்தடுத்த காட்சிகள் மீதான எதிர்பார்ப்பைத் தூண்டும் இயக்குநர் ஆண்டன் அஜித் கிளைமாக்ஸ் வரை சுவாரஸ்யங்களை அடுக்கி, படத்தை திருப்தி தரும் படைப்பாக்கியிருக்கிறார்.
Rating 3 / 5
