ரஜினி கிஷன் தயாரித்து நடிக்க, எம் ரமேஷ் பாரதி இயக்கியுள்ள கலக்கலான ஹாரர் காமெடி திரைப்படம் ‘ரஜினி கேங்.’
இந்த படத்தின் புதுமையான ஃபர்ஸ்ட் லுக் ரசிகர்கள் மற்றும் திரை ஆர்வலர்கள் மத்தியில் பெரும் வரவேற்பைப் பெற்று வருகிறது.
ஊரை விட்டு ஓடிப்போகும் ஒரு காதல் ஜோடி, கல்யாணம் செய்துகொள்ளும் நிலையில், அவர்கள் எதிர்பாராத விதமாக சந்திக்கும் அமானுஷ்ய அனுபவங்கள், அதை தொடர்ந்து நடக்கும் சம்பவங்கள் என கலகலப்பான திரைக்கதையில், கமர்ஷியல் ஹாரர் காமெடியாக இந்த படம் உருவாகியுள்ளது.
ரஜினி கிஷனுக்கு ஜோடியாக திவிகா நடித்துள்ளார். மொட்டை ராஜேந்திரன், ராம் தாஸ், கூல் சுரேஷ், கல்கி ராஜா ஆகியோர் முக்கிய கதாபாத்திரங்களில் நடித்துள்ளனர். ப்ளூ எனும் நாய் படம் முழுக்க முக்கிய கதாபாத்திரத்தில் அசத்தியுள்ளது.
பொறியாளன், போங்கு, சட்டம் என் கையில் போன்ற படங்களின் இசையமைப்பாளர் எம் எஸ் ஜோன்ஸ் ரூபர்ட் இசையில் நான்கு பாடல்கள் இடம் பெற்றுள்ளன.
படத்தின் டைட்டில் டீசர் ரசிகர்களிடம் பெரும் வரவேற்பைக் குவித்து 2.5 மில்லியன் பார்வைகளைப் பெற்றுள்ளது.
படப்பிடிப்பு சென்னையின் படப்பை, மறைமலைநகர் போன்ற பகுதிகளில் நடத்தி முடிக்கப்பட்டுள்ளது. இந்த வருட இறுதியில் இப்படத்தைத் திரைக்குக் கொண்டுவர படக்குழு திட்டமிட்டுள்ளது.
இந்த படத்தை இயக்கியுள்ள எம் மேஷ் பாரதி பிஸ்தா திரைப்படம், உப்பு புளி காரம், கனா காணும் காலங்கள் உள்ளிட்ட வெப் சீரிஸ்களை இயக்கியவர்.
MISHRI ENTERPRISES மூன்று தசாப்தங்களுக்கும் மேலாக திரைப்பட பைனான்ஸ், விநியோகம் மற்றும் தயாரிப்பில் தீவிரமாக செயல்பட்டு வருகிறது. அந்த நிறுவனத்தின் தயாரிப்பில் ஆக்சன் கிங் அர்ஜூன் நடிப்பில் மாபெரும் வெற்றிபெற்ற ‘ஜெய்ஹிந்த்’ சில வருடங்கள் முன் வெளியான ‘அஷ்டகர்மா’ படங்களின் வெற்றியைத் தொடர்ந்து இந்த படம் மூன்றாவது தயாரிப்பாக பிரமாண்டமாக தயாரிக்கப்பட்டுள்ளது.