திண்டுக்கல் லியோனியின் மகன் லியோ சிவக்குமார் நடித்திருக்கும் திரைப்படம் ‘மாண்புமிகு பறை.’

அறிமுக இயக்குநர் எஸ் விஜய் சுகுமார் இயக்கத்தில், தேனிசை தென்றல் தேவா இசையில் உருவான இந்த படத்தில், காயத்ரி ரெமா கதாநாயகியாக நடித்துள்ளார். கஜராஜ், சேரன்ராஜ், ரமா, அசோக்ராஜா, காதல் சுகுமார், ஜெயக்குமார், முத்தம்மா, ஆரியன், தர்மராஜ், நந்தகுமார், சரவணன் மற்றும் பலர் முக்கிய பாத்திரங்களில் நடித்துள்ளனர்.

இந்த படம் உயரிய கெளரவமிக்க கேன்ஸ் திரைவிழா போட்டியில் பங்கேற்று ஜூரி மெம்பர்ஸால் பார்க்கப்பட்டது. தமிழ் திரைத்துறைக்கே பெரும் பெருமை சேர்க்கும் இந்நிகழ்வு படக்குழுவினரை உற்சாகத்தில் ஆழ்த்தியுள்ளது.

பறை இசையின் பெருமை சொல்லும் இப்படம் எல்லா இசையும் ஒன்று தான் ஆனால் மற்ற இசை வாத்தியங்களுக்கு கிடைக்கும் மரியாதையும் புகழும் மட்டுமே பறை இசைக்கு கிடைப்பதில்லை, அந்த பறை இசையின் பின்னணியை, வலியை, பெருமையை சொல்லும் படைப்பாக உருவாகியுள்ளது.

படப்பிடிப்பு திருச்சி அருகே துறையூரில் நடத்தி முடிக்கப்பட்டுள்ளது. எளிய மக்களின் இசையும், வாழ்வும் அச்சு அசலாக படமாக்கப்பட்டுள்ளது.

கேன்ஸ் திரைவிழாவில் பங்கு பெற்றதைத் தொடர்ந்து திரைஆர்வலர்கள் ரசிகர்கள் மத்தியில் பெரும் எதிர்பார்ப்பை ஏற்படுத்தியுள்ளது. படம் விரைவில் திரைக்கு வருகிறது.