மிகமிக புதுமையான கதைக்களத்தில் அமைந்த காரணத்தால் வெளியாவதற்கு முன்பே உலகளவில் அங்கீகாரம் பெற்ற படம் ‘கூழாங்கல்.’
அறிமுக இயக்குநர் பி.எஸ். வினோத்ராஜா இயக்கியிருக்கும் இந்தப் படத்தில் கருத்தடையான், சிறுவன் செல்லபாண்டி இருவரும் முன்னணி கதாபாத்திரங்களில் நடித்துள்ளனர். யுவன் ஷங்கர் ராஜா இசையமைத்துள்ளார்.
படத்தின் கதை தந்த அற்புதமான உணர்வை உலகெங்கிலும் உள்ள பார்வையாளர்களுக்கு கொண்டு சேர்க்க வேண்டும் என்ற நல்லெண்ணத்தோடு இந்த படத்தை பல்வேறு திரைப்பட விழாக்களுக்கு அனுப்பியது நயன்தாரா, விக்னேஷ் சிவனின் ‘ரெளடி பிக்சர்ஸ்’ நிறுவனம். அதன் மூலம் , கூழாங்கல் ரோட்டர்டாம் 50வது சர்வதேச திரைப்பட விழாவில் பங்கேற்று மிக உயரிய விருதான டைகர் விருதை வென்றது.
கடந்த 2022-ல் 94வது ஆஸ்கர் விருதுகளுக்கு இந்தியாவின் அதிகாரப்பூர்வ நுழைவாக இந்தப் படம் இருந்தது. அதே வருடம் இண்டிபெண்டண்ட் ஸ்பிரிட் அவார்டில் சிறந்த சர்வதேச திரைப்படப் பிரிவில் சிறந்த ஐந்து திரைப்படங்களில் ஒன்றாக பரிந்துரைக்கப்பட்டது.
அப்படியாக கடந்த இரண்டு வருடங்களில் 60-க்கும் மேற்பட்ட திரைப்பட விழாக்களில் தேர்வாகி முப்பதுக்கும் மேற்பட்ட விருதுகளை வென்று சாதனை படைத்தது.
அதையடுத்து அக்டோபர் 27; 2023 அன்று சோனி லிவ் ஓடிடி தளத்தில் வெளியாகியிருக்கிறது.
படத்திற்கு ஆரம்பத்திலிருந்து ஆதரவு கொடுத்த வந்த இயக்குநர் ராமுக்கு நன்றி தெரிவித்துள்ள ’ரெளடி பிக்சர்ஸ்’ நயன்தாரா, விக்னேஷ் சிவன், ‘இந்த அப்பா மகன் பாசப்பிணைப்பு நிச்சயம் பார்வையாளர்களுக்கும் பிடிக்கும்’ என நம்பிக்கை தெரிவித்தனர்.
படக்குழு:- விக்னேஷ் குமுளை மற்றும் ஜெய பார்த்தி இருவரும் படத்திற்கு ஒளிப்பதிவு செய்திருக்க, ஞான் ஊட் மற்றும் சிஞ்சு கலை இயக்குநராக பணியாற்ற கணேஷ் சிவா படத்தொகுப்பு செய்திருக்கிறார். ஒலி வடிவமைப்பை எம்.ஏ. ஹரிபிரசாத் கவனித்திருக்கிறார்.