கேரள போலீஸ் ஒரு சிறுவன் இறந்துபோனதன் பின்னணியை அலசி ஆராய்கிறது. தமிழ்நாடு போலீஸ் ஒரு சிறுவன் காணாமல் போனதன் பின்னணியை அலசி ஆராய்கிறது. ஒரு கட்டத்தில் சிறுவன் இறந்து போனது, சிறுவன் காணாமல் போனது என இரண்டு கேஸ்களையும் கேரள போலீஸும் தமிழக போலீஸும் இணைந்து விசாரிக்கும்படியான சூழ்நிலை.

என்ன விசாரித்தார்கள், என்ன கண்டறிந்தார்கள் என்பதை ராட்சசன் பட ஸ்டைலில் சொல்லியிருக்கிறார் இயக்குநர் மதுமிதா.

கேரள போலீஸ் அதிகாரியாக அர்ஜுன்தாஸ். தன்னை இழிவுபடுத்திப் பேசுவதை வழக்கமாக கொண்டிருந்த அப்பாவால் ஏற்பட்ட உளவியல் பிரச்சனையை பிரதிபலிப்பதாகட்டும், உயரதிகாரிகளால் மரியாதைக் குறைவாக நடத்தப்படும்போது மன உளைச்சலுக்கு ஆளாவதாகட்டும், வழக்கு விசாரணையில் சுறுசுறுப்பாக செயல்படுவதாகட்டும் நடிப்பு கச்சிதம்.

அர்ஜுன்தாஸை புரிந்து கொள்ளாமல் உயரதிகாரிக்கான கம்பீரம், அலட்டல், திமிர் காட்டுவது புரிந்து கொண்டபின் அவருக்குரிய மதிப்பளித்து வேலையை சின்சியராக பார்க்கிற அதிகாரியாக வலம்வருவது என சஞ்சனா நடராஜனின் நடிப்பு அசத்துகிறது.

கதையின் முக்கிய கேரக்டரை ஏற்றிருக்கிற சிறுவன் நீரவ், நீரவ்வின் அம்மாவாக ஸ்ரிஷ்டி, அக்காவாக ஜாரா வினீத் சந்தோக், மற்ற கேரக்டர்களில் ஜெயபிரகாஷ், அனுபமா குமார்… ஒவ்வொருவரும் ஒவ்வொரு விதத்தில் கவனிக்க வைக்கிறார்கள்.

குளிர்ப் பிரதேசப் பகுதிகள் கதை நிகழ்விடங்களாக இருக்க வளைத்துச் சுருட்டி விஷுவல் விருந்து வைக்கிறார் ஒளிப்பதிவாளர் ப்ரீத்தா ஜெயராமன். கதையோட்டத்தின் திக்திக் தருணங்களில் விறுவிறுப்பான பின்னணி இசையை படரவிட்டிருக்கிறார் முஜீப் மஜீத்.

ஒரே மாதிரியான தோற்றம் கொண்ட சிறுவர்களை சைக்கோ கொலைகாரன் குறிவைத்து ஒரே மாதிரியாக கொல்வது என்கிற பய நரம்புகளை உசுப்பேற்றுகிற கதையை எடுத்துக் கொண்டு அதற்கான திரைக்கதையில் அலற விடுகிற விஷயங்களை பார்த்துப் பார்த்துச் சேர்த்திருக்கிற இயக்குநர் மதுமிதா கொலைக்கான காரணத்தை வேறு விதமாக யோசித்திருக்கலாம்.

Rating 3 / 5