பல்வேறு கதாபாத்திரங்களில் தொடர்ந்து தனது திறமையை வெளிப்படுத்தி வரும் நடிகை ஷாஷா சிவகுமார், சஜீவ் பழூர் எழுதி இயக்கியுள்ள ‘என்ன விலை’ திரைப்படத்தில் முக்கியமான கதாபாத்திரத்தில் நடித்துள்ளார். இந்தப் படத்தில் அவர் முதன்முறையாக கிராமப்புறப் பெண்ணான மணிமேகலை கதாபாத்திரத்தில் நடித்திருப்பது அவருக்கு முற்றிலும் புதிய அனுபவமாக அமைந்துள்ளது.

செப்டம்பர் 17ஆம் தேதி திரையரங்குகளில் வெளியாகவுள்ள இந்தப் படத்தில் நடிப்பதற்காக, படப்பிடிப்புத் தளத்திற்குச் செல்வதற்கு முன்பே அந்த கதாபாத்திரத்திற்காக தன்னை தயார்படுத்திக் கொண்டதாக ஷாஷா சிவகுமார் தெரிவித்துள்ளார். மேலும், முற்றிலும் மாறுபட்ட புதிய சூழலில் பணிபுரிவதற்கான வாய்ப்பையும் இந்தப் படம் தனக்கு கொடுத்ததாகவும் அவர் கூறியுள்ளார்.

‘என்ன விலை’ திரைப்படத்தில் தனது கதாபாத்திரம் குறித்து ஷாஷா சிவகுமார் பகிர்ந்து கொண்டதாவது, “மணிமேகலை எனக்கு மிகவும் சிறப்பான கதாபாத்திரம். ஏனெனில், நான் முதன்முறையாக ஒரு கிராமப்புறப் பெண்ணாக நடித்திருக்கிறேன். படப்பிடிப்புத் தளத்திற்குச் செல்வதற்கு முன்பே இந்தக் கதாபாத்திரத்திற்காக என்னை தயார்படுத்திக் கொண்டேன். அது அந்த கதாபாத்திரத்தை நன்றாகப் புரிந்துகொண்டு அணுக எனக்கு உதவியது. இது எனக்கு முற்றிலும் மாறுபட்ட அனுபவமாக இருந்தது. ‘என்ன விலை’ படம் மூலம் இப்படிப்பட்ட வாய்ப்பு கிடைத்ததில் நான் மிகவும் மகிழ்ச்சியடைகிறேன்” என்றார்.

மேலும், கருணாஸ் மற்றும் நிமிஷா சஜயனுடன் இணைந்து பணியாற்றிய அனுபவம் குறித்தும் ஷாஷா சிவகுமார் பகிர்ந்துள்ளார். அவர்களின் திறமை மற்றும் பணியின் மீதான அர்ப்பணிப்பு காரணமாக, அவர்களுடன் இணைந்து நடிப்பது தனக்கு கூடுதல் பொறுப்புணர்வை கொடுத்ததாக அவர் தெரிவித்துள்ளார்.

மேலும் அவர் பகிர்ந்து கொண்டதாவது, “கருணாஸ் சார் ஒரு அற்புதமான நடிகர். நிமிஷா மிகவும் திறமையானவர், கடினமாக உழைப்பவர். அவர்களைப் போன்ற நடிகர்களுடன் இணைந்து நடிக்கும்போது இயல்பாகவே நமக்கும் பொறுப்புணர்வு வந்துவிடும். இயக்குநர் சஜீவ் சார் படப்பிடிப்புத் தளத்தில் அனைவரிடமும் எப்போதும் மிகவும் பொறுமையாகவும் மரியாதையுடனும் நடந்து கொண்டார். மேலும், மலையாளத் திரையுலகை சேர்ந்தவர்களுடன் நான் முதன்முறையாக பணியாற்றியுள்ளேன். எனவே, இது எனக்கு முற்றிலும் வித்தியாசமான மற்றும் கற்றல் அனுபவமாக இருந்தது” என்றார்.

சமூக முக்கியத்துவம் வாய்ந்த பின்னணியில் உருவாகியுள்ள ‘என்ன விலை’, ராமேஸ்வரம் அருகே கடலில் பக்தர்கள் காணிக்கையாக செலுத்தும் நாணயங்களை மீட்டெடுத்து வாழும் ஒருவரின் கதையை மையமாகக் கொண்டது. கண்ணியத்துடனும் வாழ்வாதாரத்துக்காகவும் அவர் நடத்தும் போராட்டம், இறுதியில் ஒரு முக்கியமான சட்டப் போராட்டத்திற்கு வழிவகுக்கிறது.

இந்தப் படத்தில் கருணாஸ், நிமிஷா சஜயன், ஷாஷா சிவகுமார், விஜயலட்சுமி வீரமணி, சித்தா தர்ஷன், பூர்ணிமா பாக்யராஜ், ஒய்.ஜி. மகேந்திரன், மொட்ட ராஜேந்திரன், நிழல்கள் ரவி, பிரவீணா, மோகன் ராம், சேத்தன் குமார், கவிதாலயா கிருஷ்ணன், கமலேஷ், கோலி சோடா பாண்டி, ஜே.எஸ். கவி, சுவாமிநாதன், தீபா சங்கர், கவி நக்கலைட்ஸ் உள்ளிட்ட பலர் நடித்துள்ளனர்.

சஜீவ் பழூர் எழுதி இயக்கியுள்ள இந்தப் படத்தை கலாமயா ஃபிலிம்ஸ் நிறுவனத்தின் சார்பில் ஜிதேஷ் வி தயாரித்துள்ளார். படத்தின் இசையை சாம் சி.எஸ். அமைத்துள்ளார். ஒளிப்பதிவை ஆல்பி ஆண்டனி மேற்கொண்டுள்ளார். படத்தொகுப்பை ஸ்ரீஜித் சாரங் கவனித்துள்ளார்.

சமூக முக்கியத்துவம் வாய்ந்த கதைக்களம் மற்றும் திறமையான நடிகர்களுடன் உருவாகியுள்ள ‘என்ன விலை’ திரைப்படம் உலகம் முழுவதும் செப்டம்பர் 17 அன்று திரையரங்குகளில் வெளியாகிறது.