மகள் ஐஸ்வர்யாவை கதாநாயகியாக்கி ‘ஆக்சன் கிங்’ அர்ஜுன் கிங் இயக்கியிருக்கும் படம்.

சீதா (ஐஸ்வர்யா) ஒரு இடத்துக்கு போய்ச் சேர வேண்டிய நேரத்தில் போகாமல் சற்று தாமதமாக போகிறார். அந்த தாமதத்தால் உயிரிழப்பு நேர்கிற அளவில் நடந்த ஒரு ஆபத்திலிருந்து தப்புகிறார். அந்த இடத்துக்கு பயணித்து வந்தபோது யார் யாரால் தாமதமானதோ அவர்களை நேரில் சந்தித்து நன்றி சொல்ல நினைக்கிறார்.

இப்படி ஆச்சரியப்பட வைக்கிற கதையில் துவங்கும் படத்தில், சீதா சம்பந்தப்பட்டவர்களைச் சந்திப்பதும் அந்த தருணங்களின் சுவாரஸ்யங்களையும் கலந்துகட்டியிருக்கிறது திரைக்கதை.

அப்பா இயக்குநர். மகள் காதல் கதையின் கதாநாயகி. அதனாலோ என்னவோ காதலனுடன் ஒரு கட்டிப் பிடிப்பு, ஒரு முத்தம் என ஏதுமில்லாமல் வெறுமனே உணர்வுகளை உடல்மொழியாலும் வசனங்களாலும் மட்டுமே வெளிப்படுத்த வேண்டியிருக்கிறது. அதை மிகச்சரியாக செய்திருக்கிறார் ஐஸ்வர்யா அர்ஜுன்.

நாயகன் நிரஞ்சன், சிலபல காரணங்களால் கல்யாணத்துக்கு மறுப்பு தெரிவித்து வரும் நாயகியின் மனதை மாற்றுவதற்காக களமிறங்கும் மனநல நிபுணர் கதாபாத்திரத்தில் பொருந்திப் போகிறார்.