ரங்கோலி பட இயக்குநர் வாலி மோகன் தாஸ், புதுமையான ஆக்சன் டிராமாவாக இயக்கியுள்ள படம் ‘மெட்ராஸ்காரன்.’ மலையாளத்தில் புகழ்பெற்ற கும்பளாங்கி நைட்ஸ், ஆர் டி எக்ஸ், இஷ்க் படப்புகழ் நடிகர் ஷேன் நிகம் தமிழில் அறிமுகமாகும் இந்த படத்தில் அவருக்கு ஜோடியாக தெலுங்குத் திரையுலகின் மிகப்பெரும் நட்சத்திரக்குடும்பமான சிரஞ்சீவி குடும்பத்திலிருந்து முன்னணி நடிகை நிஹாரிகா நடித்துள்ளார். அவர்களுடன் கலையரசன், ஐஸ்வர்யா தத்தா இணைந்து நடித்துள்ளனர்.
விரைவில் திரைக்கு வரவுள்ள இந்த படத்தின் டீசர் வெளியீட்டு விழா சென்னையில் நடந்தது.
நிகழ்வில் இயக்குநர் வாலி மோகன் தாஸ் பேசியபோது, ”என் புரொடியூசர் ஜெகதீஸ், இந்தப்படம் ஆரம்பமாக, காரணமாக இருந்த ஐஸ்வர்யா தத்தா இருவருக்கும் நன்றி. என் மீது நம்பிக்கை வைத்து கதையை முழுதாகக் கூட கேட்காமல் தயாரித்தார். இந்த படம் கண்டிப்பாக உங்களுக்குப் பிடிக்கும்” என்றார்.
நடிகர் கலையரசன், ”என் ஊர் மெட்ராஸ். ஆனால், இந்தப்படத்தில் புதுக்கோட்டை ஆளாக நடித்துள்ளேன். வாலி அவர் முன்பு செய்த படத்தின் டீசர் காட்டினார். மேக்கிங் பிடித்திருந்தது, படத்தின் கதையும் பிடித்தது, உடனே நடிக்க ஒத்துக்கொண்டேன். படம் அருமையாக வந்துள்ளது” என்றார்.
தயாரிப்பாளர் ஜெகதீஸ், ”நம் மெட்ராஸின் அடையாளம் எல்லா ஊர்க்காரரும் இங்கு இருப்போம், எல்லா ஊர்க்காரரும் வேலை பார்ப்போம், அதே போல் இந்த மெட்ராஸ்காரனில் எல்லாமே இருக்கிறது” என்றார்.
நிகழ்வில் நடிகை ஐஸ்வர்யா தத்தா, நடிகர் சரண், இசையமைப்பாளர் சாம் சி எஸ், இயக்குநர் இளன், இளனின் தந்தை நடிகர் பாண்டியன் உள்ளிட்டோரும் பேசினர்.